Շերտավոր խմորով (տես ներքևում՝ ՇԵՐՏԱՎՈՐ ԽՄՈՐ) պատրաստված թխվածքների մեջ ամենահարգին համարվում են գաթան, փախլավան, և Նապոլեոնը, մանավանդ, եթե դրանք պատրաստվում են փորձառու տնտեսուհիների ձեռքով և բարձր որակով:
Ներկայացնում ենք «Նապոլեոնի» պատրաստման երեք բաղադրատոմս, որոնք, մեր կարծիքով, տնտեսուհիները գոհունակությամբ կընդունեն:
«Նապոլեոն»՝ առաջին բաղադրատոմս
- Սեղանին լցնել 1,5 թեյի բաժակ ալյուր, վրան կտրտել 500 գր սառած կարագ և դանակի օգնությամբ ալյուրի հետ խառնելով՝ մանրացնել այնքան, որպեսզի կարագի կտորները դառնան լոբու կամ սիսեռի չափ: Ստացվում է փշրվող զանգված:
- Այն բաժանել երեք մասի և դնել սառնարանի սառցի բաժնում, որպեսզի կարագը չփափկի: Էմալապատ ամանի մեջ կոտրել 3 ձու, մի քիչ հարել, ավելացնել 1 թեյի բաժակ գոլ ջուր, 1,5 ճաշի գդալ գինու քացախ (հիշեք, այս խմորի մեջ աղ պետք չէ), այնքան ալյուր (3-5 թեյի բաժակ, դա կախված է ձվի մեծությունից), որ ստացվի չկպչող, սովորական փափուկ խմոր:
- Ալյուրը պետք է մաս-մաս լցնել, որպեսզի շատ պինդ խմոր չստացվի: Հունցելուց հետո խմորը 10-15 րոպե թողնել սեղանին, որպեսզի հանգստանա և հեշտությամբ բացվի:
- Դրանից հետո ամբողջ զանգվածը գրտնակով բացել, մինչև կեսը լցնել սառնարանում դրված ալյուրախառն զանգվածի 1/3 մասը, խմորի մյուս կեսով ծածկել, կողքերն ամրացնել, որպեսզի կարագի կտորները չթափվեն և կրկին բացել: Այս անգամ բացված խմորը ավելի մեծ պետք է լինի:
- Նույն ձևով լցնել երկրորդ բաժին կարագը, մինչև կեսը փակել վերը նշված ձևով և կրկնել երրորդ անգամ:
- Վերջին անգամ կողքերը դարձյալ լավ փակել և կրկին բացել որքան հնարավոր է (0,5 սմ հաստությամբ) և ռուլետի պես փաթաթել, ձեռքով կողքերին բոլոր կողմերին ձեթ քսել և 30 րոպե դնել սառնարանի սառցի բաժնում, որից հետո հանել բաժանել 7 գնդի (եթե ջեռոցի թավան մեծ է՝ 4 տեղանոց գազoջախի համար նախատեսված չափը) իսկ եթե ավելի փոքր է, ապա ավելի շատ գնդերի կարող եք բաժանել:
- Յուրաքանչյուր գունդը բացել շատ բարակ և թխել ոչ թե թույլ, այլ միջին կրակով:
- Հաջորդ գունդը գրտնակով բացելուց հետո 1-2 րոպե անց ջեռոցում եղածը պետք է թխվի, հետևապես պետք է թխվելու ժամանակը յուրաքանչյուր տնտեսուհի ճիշտ իր ջեռոցի ջերմությանը համապատասխան ընտրի:
- Գնդերը բացելիս աշխատեք առանց ալյուրի, որպեսզի փխրուն ստացվի, իսկ եթե որոշ տեղերում խմորը կպչի սեղանին, թեթևակի տակը ալյուր ցանեք:
- Թխվելիս շերտերը շատ են բարձրանում, հետևապես կարելի է երկու մեծ «Նապոլեոն» պատրաստել:
- Օգտագործել միայն 13-րդ կրեմը (տես ներքևում՝ ԿՐԵՄ 13), ուրիշ կրեմով համեղ չի ստացվում: Իսկ եթե այդ պահին խտացրած կաթ չլինի, խորհուրդ ենք տալիս օգտագործել «Սիրողական կրեմ»՝ (տես ներքևում՝ ԿՐԵՄ 11):
«Նապոլեոն»՝ երկրորդ բաղադրատոմս
- Այս «Նապոլեոնը» պետք է թխել միմիայն մարգարինով:
- Սեղանին լցնել 3 թեյի բաժակ ալյուր, վրան կտրտել 250 գր մարգարին, ալյուրի հետ խառնելով՝ մարգարինը մանրացնել, ստացվում են փշուրներ, մեջը փոս անել, 1 թեյի բաժակի մեջ կոտրել 1 ձու, ավելացնել մեկ պտղունց աղ, 1 ճաշի գդալ քացախ, մի քիչ հարել, և մինչև բաժակի ծայրը ավելացնել սառը ջուր, լցնել ալյուրի վրա: Խմորը հունցելուց հետո բաժանել 4 մասի: Յուրաքանչյուր գունդը գրտնակով բացել, վրան քսել 25 գրամ մարգարին, ծրարի պես ծալել, 20 րոպե դնել սառնարանում: Հետո գնդերը բացել 5 մմ հաստությամբ և թխել:
- Օգտագործել ԿՐԵՄ 14-ը (տես ներքևում):
«Նապոլեոն»՝ երրորդ բաղադրատոմս
- Այս «Նապոլեոնը» թխել շերտավոր խմորով (տես ներքևում՝ ՇԵՐՏԱՎՈՐ ԽՄՈՐ), որով կարող եք թխել՝ նախապես խմորը թեյի պնակով կտրելով (հատով «Նապոլեոն»):
ՇԵՐՏԱՎՈՐ ԽՄՈՐ
- Վերցնել 800 գր կարագ կամ մարգարին, 4 ձվի դեղնուց, 1 թ/բ գոլ ջուր, 2 ճ/գ ընտիր քացախ, մի պտղունց աղ, 6-8 թեյի բաժակ ալյուր։
- 4 ձվի դեղնուցը մի քիչ հարել, ավելացնել 400 գր կարագ, խառնել, վրան լցնել 1,5 թեյի բաժակ գոլ ջուր, մի պտղունց աղ, 2 ճ/գ քացախ, 6-8 թ/բ ալյուր (եթե քիչ լինի, կարելի է ավելացնել), հունցել ձեռքերին չկպչող փափուկ խմոր, բաժանել 4 գնդի, 20-25 րոպե դնել սառնարանում, որից հետո յուրաքանչյուր գունդն առանձին բացել, կարագ քսել, ծալել, դնել սառնարանում։
- Նույնը կրկնել բոլոր գնդերի հետ 3 անգամ՝ հավասարապես օգտագործելով մնացած 400 գրամ կարագը։ Նախընտրելի է խմորը պատրաստել մեկ օր առաջ։
- Այս խմորով կարելի է թխել նաև գաթա, փախլավա, խաչապուրի, մսով կարկանդակներ, սիգարետ, ձագար (տրուբոչկա), բոնբոնչկի և այլն։
ԿՐԵՄ 11 - ՍԻՐՈՂԱԿԱՆ
- 2 թեյի բաժակ շաքարավազը և 2 լիքը ճաշի գդալ ալյուրը լավ խառնել, ավելացնել 2 թեյի բաժակ եռացրած-սառեցրած կաթ (կարելի է նաև ջուր) և մեղմ կրակով եփել: Սառչելուց հետո քիչ-քիչ լցնել լավ հարած 300 գրամ կարագի վրա: Վերջում ավելացնել 1 հատ վանիլին:
- Օգտագործել նաև «Բոնբոնչիկ», «Բայադերա» թխվածքների և բիսքվիտից պատրաստվող ամեն տեսակ տորթերի համար:
- Հիշե՜ք, շերտերը սառչելուց հետո անմիջապես կրեմ քսել։
ԿՐԵՄ 13
- 250 գր փափուկ կարագը լավ հարել և մաս-մաս ավելացնել 1,5 բանկա խտացրած կաթ, 1 հատ վանիլին:
- Առաջին «Նապոլեոնի» համար օգտագործել միայն այս կրեմը:
ԿՐԵՄ 14
- 200 գր կարագը լավ հարել և քիչ-քիչ ավելացնել 1 բանկա խտացրած կաթ, 1 հատ վանիլին:
- Նպատակահարմար է շաքարային թխվածքների համար՝ շերտերն իրար միացնելիս։
- Շերտերը կրեմով միացնել, երեսին կրեմ քսել, վրան ցանել «Նապոլեոնի» փշրանքներից և շաքարի փոշի:
Բաղադրատոմսը՝ Ամալյա Բաղդասարյանի
|
